ISSN 2955-2206 (веб верзија) (online)

УДК: 004.8:78.067.26

Стефан Марковски

„АВТОМАТИЗИРАНА КРЕАТИВНОСТ“: ВЕШТАЧКОИНТЕЛИГЕНТИТЕ ЈАЗИЧНИ МОДЕЛИ И „НОВИТЕ СТАНДАРДИ“ НА „ПИШУВАЊЕ“ (ИЛИ ГЕНЕРИРАЊЕ) ХИП-ХОП ТЕКСТОВИ СО РАЗЛИЧНИ СТЕПЕНИ НА АВТЕНТИЧНОСТ

Апстракт: Од вештачката интелигенција во 21 век сè пораширено е оче­кувањето да претставува клучна трансформативна сила во сите домени на креативноста, каде е вклучена и музиката. Во рапот и хип-хопот, употребата на вештачкоинтелигентен софтвер е несомнено пат до една сосема нова ера на иновации и уметничко изразување. Употребата на вештачка интелигенција од страна на музичарите доживува голем подем во кој, се чини, длабоко ис­преплетениот креативен спој меѓу луѓето и технологијата ќе стане основен општоприфатен творечки modus operandi, особено кога станува збор за пи­шувањето, односно (ко)авторството над хип-хоп/рап текстовите.

Клучни зборови: вештачка интелигенција, автоматизирана креативност, хип-хоп, генерирани текстови.